Galwadau Allan
Beth sy'n digwydd pan gaiff y tîm ei alw?
Mae'r cyfan yn dechrau pan fydd rhywun yn ffonio Heddlu Gogledd Cymru (HGC) am help - naill ai unigolyn neu sefydliad arall fel Gwasanaeth Ambiwlans Cymru. Gall HGC benderfynu o'r alwad gychwynnol bod angen ein cymorth, neu gallent gynnal eu chwiliadau ac ymholiadau eu hunain yn gyntaf. Byddant wedyn yn cysylltu â'n Rheolwr Chwilio ar alwad.
Bydd ein rheolwr chwilio yn asesu'r alwad allan, yn llunio cynllun cychwynnol ac yn anfon rhybudd testun at holl aelodau'r tîm i ymgynnull cyn gynted â phosibl mewn lleoliad penodol. Daw llawer o'n gwirfoddolwyr yn syth o'r gwaith neu ymrwymiadau teuluol. Bydd aelodau dynodedig o'r tîm yn casglu ein cerbydau rheoli a chyfarpar ar y ffordd.
Chwilio
Yn ystod chwiliad am berson coll, caiff ein Cerbyd Rheoli Digwyddiad (CRhD) ei sefydlu fel canolfan symudol. Rydym yn defnyddio cyfathrebu radio a rhyngrwyd ynghyd â systemau cyfrifiadurol arbenigol i gynllunio, cydgysylltu, a chofnodi digwyddiad wrth iddo ddatblygu. Gall Cynghorydd Chwilio'r heddlu (PolSA) ymuno â'n tîm gweithrediadau chwilio yn yr ICV.
O'r ganolfan hon, caiff ein gwirfoddolwyr cymwysedig eu trefnu'n bartïon a byddant yn cychwyn chwilio mewn ardaloedd rhagddiffiniedig a nodwyd yn leoliadau arwyddocaol lle gallai'r person coll fod.
Bydd y timau'n parhau i chwilio hyd nes:
- Bod y person coll wedi'i ganfod, neu;
- Bod yr heddlu'n galw'r chwiliad i ben (megis pan ddaw gwybodaeth newydd i law), neu;
- Bod yr heddlu'n atal y chwiliad (megis pan fo'n anniogel i barhau).
Mewn achos o ohirio, gall y chwiliad barhau pan ddaw'n ddiogel eto neu pan geir adnoddau i leihau risg.
Achub
Yn ystod gweithrediad achub, efallai na fydd angen yr CRhD arnom, ac yn hytrach byddwn yn defnyddio ein cerbyd 4x4 i gludo cyfarpar mor agos â phosibl at ein claf. Oddi yno, rydym yn anfon tîm ymateb cyflym i asesu'r claf ac adrodd yn ôl i'r ganolfan. Defnyddir y wybodaeth a ddarperir i benderfynu pa adnoddau ychwanegol y gallai fod eu hangen, ac i sicrhau'r cwrs gweithredu mwyaf diogel ac effeithlon.
Mae achub yn gyflawn pan fo'r claf yn ddiogel yng ngofal gwasanaeth neu berson priodol - weithiau parafeddygon, weithiau'r heddlu, weithiau teulu a ffrindiau.
Gallwn weithio ochr yn ochr â gwasanaethau eraill fel:
- Hofrenyddion Gwylwyr y Glannau
- Gwasanaeth Ambiwlans Cymru
- Timau Chwilio ac Achub cyfagos
Rydym yn gweithredu ym mhob tywydd, ddydd a nos. Mae holl aelodau'r tîm yn gymwysedig mewn cymorth cyntaf, ac mae gennym hefyd aelodau â lefel uwch o hyfforddiant meddygol, gan gynnwys nyrsys cofrestredig.
Mae pob gwirfoddolwr yn barod ac wedi'u cyfarparu i weithredu am hyd at 8 awr heb ryddhad, ond nid yw'n anarferol i chwiliadau ymestyn y tu hwnt i hynny. Yn aml iawn, daw'r alwad allan yn hwyr gyda'r nos neu'n gynnar iawn yn y bore, unwaith y bydd yr heddlu wedi disbyddu eu hymholiadau eu hunain.
Mae'r Tîm wedi ymateb i nifer o alwadau allan ers dod yn weithredol yn haf 2018. Rydym wedi gallu aduno pobl goll â'u teulu a'u ffrindiau ac, lle roedd y canlyniad yn llawer mwy trist bod y teulu yn cael diweddglo. Mae Chwilio ac Achub yn heriol ond hynod werth chweil, ac rydym i gyd yn falch o fod yn rhan o'r tîm sy'n darparu gwasanaeth hanfodol i'n cymuned; dyna pam rydym yn gwirfoddoli.
Adborth
Er nad ydym yn disgwyl hynny, byddwn weithiau'n clywed yn ôl gan bobl yr ydym wedi'u cynorthwyo.
Rydym bob amser yn croesawu diweddariadau ar wellhad, ac rydym wedi derbyn ambell sylw hyfryd.
"- extremely grateful for the swift response and the number of volunteers who attended during the early hours of the morning."
"- MônSAR Lowland Rescue Team continue to develop and thrive. Feedback from officers at the scene as well as the family involved, highlighted how much your professionalism, dedication, and enthusiasm were appreciated."
Detholiadau o lythyr a anfonwyd gan Heddlu Gogledd Cymru, yn dilyn chwiliad am berson coll ym Mehefin 2026.